Avancimi i rusëve në Lindje, Biden: S’do dërgojmë sisteme raketash në Ukrainë

Raportohet se tanket dhe forcat ruse kanë avancuar në qytetin kyç të Ukrainës lindore, Severdonetsk.

Ushtria e Kremlinit nuk e ndal marshimin në rajonin lindor.

Autoritetet ruse  transmetuan këto pamje të qytetit duke pretenduar se është pothuajse nën kontrollin total të separatistëve.

Dëshmitarët thanë se tanket ruse përparuan drejt qendrës së qytetit, e herë pas here dëgjoheshin shpërthime  duke rrafshuar gjithçka që u dilte përpara.

Kryetari i bashkisë së qytetit  u shpreh se qyteti është shkatërruar dhe dhjetëra mijëra njerëz janë dëbuar nga shtëpitë e tyre.

Ekspertët supozojnë se Kremlini ka menduar se nuk mund të përballojë më shumë humbje kohe dhe duhet të përdorë mundësinë e fundit për të zgjeruar pushtetin  në  territorin e Donbasit të kontrolluar nga separatistët.  Ardhja e armëve perëndimore në Ukrainë mund ta bëjë të pamundur planin rus.

Por ka  në një pengesë të dukshme për Ukrainën, Presidenti amerikan Joe Biden duket se ka hedhur poshtë raportet se SHBA po shqyrtonte dërgimin e sistemeve raketore me rreze të gjatë veprimi në vend.

“Ne nuk do të dërgojmë në Ukrainë sisteme raketash që mund të godasin Rusinë”, theksoi Biden.

Ndërkohë ministri i jashtëm rus Sergei Lavrov pretendon se ajo që Kremlini e quan “çlirimi i rajonit të Donbasit mbetet një “prioritet i pakushtëzuar” për Moskën.

LEXONI GJITHASHTU:

• Çfarë ka ndodhur 24 orët e fundit në Ukrainë?
• Rusia fajëson Perëndimin për çështjen e sigurisë ushqimore