Avokati i Popullit peng i konsensusit, mandati ka përfunduar 2 vite më parë

Kur na ndajnë 1 muaj nga përfundimi i këtij sesioni parlamentar, mazhoranca dhe opozita janë ende larg konsensusit për të votuar në seancë plenare emrin e ri të Avokatit të Popullit.

Edhe pse Erinda Ballanca ka më shumë se dy vite që e ka përfunduar mandatin në krye të institucionit, kjo nuk i ka penguar palët politik për ta zgjatur procesin, pa pasur një rezultat konkret.

Euronews Albania kontaktoi dy të kryetarët e grupeve parlamenare të Partisë Socialiste dhe Partisë Demokratike, Bledi Çuçi dhe Gazment Bardhi.

I pari zgjodhi të mos jepte një përgjigje për këtë çështje.

Ndërsa Gazment Bardhi konfirmoi se nuk ka asnjë hap të ri në zgjedhjen e Avokatit të Popullit.

Ulja në tryezë e shumicës dhe pakicës parlamentare për këtë çështje pritet të jetë pjesë e sesionit të ri parlamentar.

Nga 15 kandidatë që plotësonin kriteret ligjore, vetëm 7 prej tyre kanë siguruar 28 firmat e nevojshme të deputetëve për të shkuar për votim në parlament.

Mes emrave në garë për të drejtuar institucionin që mbron të drejtat e njeriut është ish-kryetarja e gjykatës kushtetuese, Vitore Tusha, anëtari i këshillit të lartë të prokurorisë, Tartar Bazaj, ish këshilltari ligjor i Ilir Metës president, Bledar Dervishaj apo përfaqësuesi i ish të bugosurve politik, Besim Ndregjoni.

7 KANDIDATË NË GARË PËR AVOKATIN E POPULLIT

1. Vitore Tusha
2. Tartar Bazaj
3. Besim Ndregjoni
4. Bledar Dervishaj
5. Dardan Mustafaj
6. Edison Frangu
7. Erald Aga

Në dhjetor të 2022-it, parlamenti dështoi në zgjedhjen Ledio Brahos si pasues i Erinda Ballancës, duke bërë që procesi të nisë nga fillimi.

Avokati i popullit ka një mandat 5 vjecar dhe zgjidhet me shumicë të cilësuar prej 84 votash. Në praktikën parlamentare, Avokati i Popullit është propozuar përgjithësisht nga opozita.