Avokati Ngjela: SPAK ka ndikim nga Uashingtoni, jo nga politika shqiptare

Për avokatin Spartak Ngjela, Struktura e Posaçme (SPAK) ka ndikim nga Uashingtoni dhe deri më tani, nuk është e ndikuar politikisht.

Në një intervistë për “Euronews Albania”, Ngjela u shpreh se SPAK-u ka struktura të veta të arrestimit dhe nuk beson se një konflikt i mundshëm mes ish-Drejtorit të Përgjithshëm të Policisë, Gledis Nano dhe kryemninistrit Edi Rama, mund të ketë lidhje me disa arrestime.

“Atë që tha gazetaria se janë kërkuar nga SPAK-u tre arreste të qeverisë dhe nuk ka dashur kryeministri, për mua nuk qëndron. SPAK-u është superfuqi, ka strukturat e veta të arrestimit. Arrestimin nuk e bën policia, policia zbaton urdhrin e prokurorit. Për mua, deri tani jo. Ka ndikim, por nga Uashingtoni.

Indirekt kuptohet se ka një konflikt midis politikës ose diplomacisë amerikane dhe SPAK në funksion të atyre që ju i quani peshq të mëdhenj. Është termi i atyre. Duhet të flasim profesionalisht. SPAK-u nuk ka hetim të lehtë, ka hetim shumë të rëndë”, nënvizoi avokati.

Gledis Nano u shkarkua të mërkurën nga posti i Drejtorit të Përgjithshëm të Policisë.

Lajmi u bë i ditur nga ministri i Brendshëm Bledi Çuçi pas mbledhjes së qeverisë.

Për momentin detyrat e Drejtorit të Përgjithshëm të Policisë, do i ushtrojë nën-Drejtori i Përgjithshëm, Tonin Vocaj.

LEXONI GJITHASHTU

• Shkarkimi i Nanos, Ngjela: Rama drejt absolutizmit, mund të dalë edhe kundër SHBA
• Shkarkimi i Gledis Nanos, Ngjela: Defekt i Ramës, duhet të tregonte shkakun
• Ngjarjet që rrëzuan Gledis Nanon, 10 muajt në krye të Policisë së Shtetit