Avokati tregon hapat që do të ndjekë për lirimin e Saimir Tahirit

Saimir Tahiri do të kërkojë pezullimin e dënimit të dhënë nga Apeli i Posaçëm në Gjykatën e të Drejtave të Njeriut në Strasburg. Kështu Maks Haxhia, avokati mbrojtës i ish-ministrit të Brendshëm në emisionin Sot në Euronews Albania.

Haxhia e cilësoi gafë vendimin e Apelit, që e përkeqësoi pozitën e Tahirit krahasuar me vendimin e shkallës së parë, në një kohë që pala mbrojtëse, tha ai, kishte apeluar vetëm akuzën për shpërdorim detyre.

“Hapi i parë është përgatitja e rekursit sapo të zbardhet vendimi që të shohim argumentet, sepse ato argumente që pamë në media janë skandal. Duke qenë përpara faktit që Gjykata e Apelit rëndoi pozitën e të pandehurit ne do t’i drejtohemi Strasburgut, Gjykatës së të Drejtave të Njeriut për të pezulluar ekzekutimin e dënimit”, u shpreh avokati i Tahirit.

Ai tregoi se vendimi i gjykatës ishte një goditje e fortë për familjarët e ish-ministrit, sidomos për të atin që është në gjendje të rëndë shëndetësorë për shkak të një sëmundjeje.

“I ati është në gjendje të rëndë shëndetësore dhe nuk është e lehtë për një nënë, që burri i saj, nga ministrat më të suksesshëm dënohet në mënyrë më diskriminuese për të shpejtuar që ta fusin në burg”, tha Haxhia.

Sipas avokatit, Tahirin si ministri që transformoi fytyrën e policisë, nuk e donin të gjithë ata ‘që donin një ministër oportunist që të bënte diferencime në zbatimin e ligjit’.

LEXONI GJITHASHTU:

• Samir Tahiri kokë turku për integrimin në BE, pretendon avokati
• Arsyet që çuan në dënimin e Saimir Tahirit, sipas Gjykatës