Ballkani mbetet fushë-betejë e interesave gjeopolitike, thotë analisti

Analisti politik, Krenar Shala është i mendimit se Ballkani mbetet fushë-betejë gjeopolitike e ndikimeve të shteteve të mëdha.

Duke analizuar situatën që po kalon Kosova, ai tha se tensionet i pengojnë dy vendet që të ndërmarrin reformat e nevojshme për t’u integruar në strukturat euro-atlantike dhe nga kjo përfiton kryesisht Rusia.

“Ballkani që një shekull e gjysmë është arenë e fushë-betejave politike të fuqive të mëdha, nuk është aspak çudi që kjo fushë-betejë vazhdon të jetë gjatë,” – tha Shala.

Analisti politik u shpreh se Rusia e ka bërë të qartë vazhdimisht synimin për të penguar integrimin e rajonit të Ballkanit Perëndimor në BE apo NATO. Ajo ka synime të tjera strategjike dhe përmes ndikimeve të ndryshme tensionon situatën që shtetet të mos i ndërmarrin reformat e nevojshme për integrimin.

Shala mori si shembull Malin e Zi dhe tha se destabilizimi në këtë shtet erdhi si rrjedhojë e ndikimeve të Rusisë. Ai shtoi se ngjashëm po synohet të bëhet edhe me Kosovën aktualisht.