Balluku dhe Kumbaro monitorojnë situatën nga reshjet e shiut në Gjirokastër, pushteti vendor në terren

Situata e shkaktuar nga reshjet e shiut në Qarkun e Gjirokastrës vijon të jetë problematike, ndërsa institucionet po monitorojnë nga afër zonat e prekura.

Në takimin e Shtabit të Emergjencave për Prefekturën e Gjirokastrës, që u zhvillua këtë të enjte, ishin të pranishme zv/kryeministrja Belinda Balluku dhe ministrja e Arsimit dhe deputete e Qarkut, Mirela Kumbaro. Gjatë bashkëbisedimit me drejtues të institucioneve publike, pushtetit vendor dhe strukturave të Forcave të Armatosura, u konfirmua se situata është nën kontroll.

Në takim u theksua rëndësia e koordinimit ndërinstitucional për të adresuar sa më shpejt problematikat e krijuara për banorët.

“E gjithë situata është nën kontroll. Diskutuam disa pika kryesore që duhet të zbatohen menjëherë, përfshirë planin e evakuimit. Ky plan duhet të jetë i gatshëm për të gjitha bashkitë, duke përdorur njësitë hotelerie dhe konvikte për të lehtësuar akomodimin e banorëve, dhe duke bashkëpunuar me emergjencat civile për të siguruar hapësira të sigurta në rast nevoje,” – deklaroi Balluku.

“Falë kontrollit, menaxhimit dhe mobilizimit të sektorit publik dhe privat, si dhe të Forcave të Armatosura, situata është menaxhuar në mënyrë efektive. Jemi 24 orë në monitorim, duke u fokusuar jo vetëm në qytetin e Gjirokastrës, por edhe në zonat administrative. Për sektorin e arsimit, situata është nën kontroll, ndërhyjmë vetëm në disa shkolla në zonën e Këlcyrës-Përmetit dhe në Gjirokastër,” – tha Kumbaro.

Gjatë ditëve të fundit, reshjet e shiut kanë shkaktuar dëme të ndryshme në Qarkun e Gjirokastrës, duke prekur banorët dhe infrastrukturën lokale. Institucionet vazhdojnë të jenë në gatishmëri për të parandaluar përkeqësimin e situatës.