Balluku në rrugën Elbasan-Qafë Thanë: Brenda qershorit, procedura për lotin e dytë

Ministrja e Infrastrukturës dhe Energjisë, Belinda Balluku, ndoqi nga afër punimet në lotin e parë në rrugën Elbasan-Qafë Thanë, pjesë e Korridorit 8. Brenda qershorit pritet zhvillohet procedura për lotin e dytë të kësaj vepre.

Punimet në lotin e parë të rrugës Elbasan-Qafë Thanë kanë avancuar. Deri më tani janë realizuar afro 23% e punimeve fizike të fokusuara kryesisht në hapjen e trasesë dhe ndërtimin e mbrojtjes lumore, tha Balluku.

“Për ne ky korridor ka dhe një vlerë shumë të madhe përsa i përket portit të ri të Durrësit, pasi parashikon lidhjen direkte me portin e ri të Durrësit si përmes autostradave, ashtu dhe përmes hekurudhës dhe duke furnizuar kështu portin e thatë të Strugës që do të jetë pjesë e portit të ri të Durrësit”, tha Balluku.

Brenda muajit qershor pritet të zhvillohet procedura edhe për lotin II të kësaj vepre, i cili përfshinë segmentin që nis në Mirakë dhe përfundon tek kthesat e Murrashit. Tek prioritetet, Balluku renditi edhe bypass-in e Elbasanit.

“Prioritet për ne mbetet bypassi i Elbasanit, i cili tashmë është në fazë studimi. Shumë shpejt do të kemi projektin për të filluar më pas garën. Sigurisht ne do të aplikojmë, siç kemi bërë me të gjithë bypass-et në fondet e IBRD dhe të Bankës Europiane për Investim me shpresën që të kemi mbështetjen e tyre, duke e ditur që ky është një nga projektet më të rëndësishme infrastrukturore dhe të ndërlidhjes, pasi tashmë autostrada Tiranë-Elbasan është një autostradë shumë e frekuentuar”, tha Balluku.

LEXONI GJITHASHTU:

• Rruga e Arbrit, Balluku inspekton punimet në aksin Plani i Bardhë-Qafa e Buallit
• Balluku inspekton ujësjellësin e ri të Lushnjës: Pagat do rriten dhe për këtë sektor