Balta përmbyt ishullin italian, viktima dhe të humbur nga moti i keq në Iskia

Një grua ka vdekur, ndërsa shumë persona të tjerë konsiderohen të humbur pasi shirat e dendura shkaktuan rrëshqitje të mëdha toke në ishullin italian të Iskias.

Një valë balte dhe mbeturinash përshkoi qytetin e vogël Kazamiçola Terme, duke mbuluar të paktën një shtëpi dhe duke marrë me vete drejt detit shumë automjete.

“Kam frikë se mund të ketë viktima të tjera, por deri tani bilanci zyrtar flet për një të vdekur. Bëhet fjalë për trupin e një gruaje që u gjet e pajetë”, tha Luca Cari, zëdhënës i Departamentit të Zjarrfikësve.

Operacionet e shpëtimit janë penguar nga shirat e vazhdueshme dhe erërat e forta, që kanë vonuar edhe lëvizjen e trageteve, përmes të cilëve vinin përforcime nga Italia kontinentale.

LEXONI GJITHASHTU:

• Dhjetëra të zhdukur nga përmbytjet në Itali, 200 familje të evakuuara
• Përmbytjet dëmtojnë urat