Bardh Spahia: Sigla teknikalitet, demokratët i njohin përfaqësuesit e vërtetë

Bardh Spahia u votua dje nga demokratët në primaret në Shkodër për të kandiduar për “PD-në e Berishës” në zgjedhjet e pjesshme vendore të 6 marsit.

Mirëpo Partia Demokratike zyrtare deklaroi dje pas votimeve se kandidatët e zgjedhur “nuk kanë lidhje me PD-në”.

Këtë deklaratë, Bardh Spahia e quan akuzë dhe e cilëson qesharake.

Në emisionin Now ai tha se po kandidon në formën më të natyrshme, duke vazhduar rrugëtimin e paraardhësve të tij. I ati, Ali Spahia, ishte themelues i PD-së.

“Unë dhe vëllezërit e motrat e mia jemi rritur me sukseset dhe vështirësitë e saj që në vitet e para të themelimit”, tha Spahia.

Faktin që nuk po kandidon nën siglën e PD-së, por në koalicion me LSI-në, Spahia e quan teknikalitet.

Ai thotë se kjo mënyrë kandidimi nuk do t’i konfuzojë votuesit demokratë, pasi “demokratët e gjithë Shqipërisë dhe sidomos Shkodrës dinë të identifikojnë partinë e vërtetë demokratike dhe përfaqësuesit e saj”.

Kandidatët e Komisionit të Rithemelimit do të kandidojnë në koalicion me LSI-në. LSI nuk do të ketë kandidatë të vetët por do të mbështesë kandidatët e Berishës.

Këtë e konfirmoi edhe anëtarja e kryesisë së LSI-së, në emisionin “Now”.

“Marrëveshja është mes Brahimllarit dhe Këllëçit. Ne nuk do kemi kandidat për kryetar do mbështesim ato të Berishës”, u shpreh ajo.