Bardhi kërkoi të anulohet koncerti i Kanye West, Gonxhe: Ti merrni të keqen, do jetë eventi më i rëndësishëm i Shqipërisë

Kreu i grupit parlamentar të PD-së, Gazment Bardhi, i kërkoi mazhorancës të anulonte koncertin e artistit Kanye West, duke e cilësuar atë si simbol të antisemitizmit.

Sipas Bardhit është e parpranueshme që mazhoranca “të japë leksione antisemitizmi për pjesëmarrësit në protestë” dhe nga ana tjetër të lejojë një protestë të tillë.

Në lidhje me këto deklarata ka reaguar ministri i Kulturës, Blendi Gonxhja, i cili sqaroi se eventi i planifikuar për datën 11 është organizuar që në muajin janar dhe nuk ka lidhje me situatën aktuale apo me zhvillimet politike.

“Do doja të sqaroja opinionin publik sa i takon eventit të jashtëzakonshëm të datës 11, i cili është planifikuar që në janar dhe nuk lidhet me asnjë aktualitet protestash”, u shpreh Gonxhja.

Ai shtoi se bëhet fjalë për një artist të njohur ndërkombëtarisht, i cili ka performuar në disa vende të Evropës dhe më gjerë, duke theksuar se koncerti në Shqipëri do të jetë një nga ngjarjet më të rëndësishme kulturore në vend.

“Sqaroj të gjitha insinuatat rreth koncertit. Kanye West është një super artist që ka performuar në Holandë, Spanjë, Portugali dhe Turqi. Ata që kanë diçka kundër eventit, më vjen keq, por do të jetë një nga eventet më të jashtëzakonshme të Shqipërisë, që na fut në ligën e kampionëve të eventeve elitare kulturore”, deklaroi ai.