Bardhi takon ministrin gjerman për Europën: Jetike për Shqipërinë lufta ndaj korrupsionit 

Kreu i Grupit Parlamentar të Partisë Demokratike, Gazment Bardhi, zhvilloi një takim me ministrin gjerman për Europën, Gunther Krischbaum.

Në një postim në faqen e vet në Facebook, Bardhi shprehet se ka ndarë me kryediplmatin gjerman nevojën jetike që ka vendi për të luftuar korrupsion dhe për të mbajtur zgjedhje të lira dhe të ndershme.

Postimi i plotë i Bardhit

Kënaqësi takimi me Ministrin per Europën në Ministrinë e Jashtme Gjermane z. Gunther Krischbaum.

Integrimi Europian i Shqipërisë duhet të jetë një proces që synon implementimin e standardeve europiane në vend, dhe jo të përdoret si justifikim për të mbuluar keqqeverisjen. Opozita mbështet plotësisht procesin e integrimit të bazuar në standarde dhe në meritë. 

Në këtë proces, theksova se mbetet jetike për Shqipërinë garantimi i zgjedhjeve të lira dhe të ndershme, qeverisja e mirë në dobi të qytetarëve, lufta ndaj korrupsionit dhe lidhjeve të qeverisjes me krimin e organizuar, lejimi i organeve të drejtësisë të bëjnë me integritet dhe pavarësi punën e tyre në përputhje me parimet e shtetit ligjor, si dhe funksionimi demokratik i institucioneve, veçanërisht i Kuvendit të Shqipërisë.