Basha akuza Ramës: Nuk ka krizë energjitike, por korrupsion dhe keqmenaxhim

Kryetari i Partisë Demokratike, Lulzim Basha është shprehur se nuk ka krizë energjitike, por “është një krizë korrupsioni dhe keqmenaxhimi me shkak dhe plan”.

“I keni bilancet e operatorëve të energjisë. I keni parë si në verë shesin me çmim të ulët dhe e blenë me 3-4 fshih të çmimit pak muaj më vonë, me tenderë fiktivë, me lekët që mblidhen nga taksat shqiptarëve”, u shpreh Basha gjatë një konference për mediat.

Kryedemokrati i quajti ndërmarrje të zhytura në korrupsion dhe kilentelizëm OSHEE-në dhe KESH-in.

“Ka një bollëk për Edi Ramën dhe hajdutët e KESH dhe OSHEE, 10 milionë euro të pajustifikuara midis çmimit të tregut dhe sa e blejnë këtë energjinë”, u shpreh z. Basha.

Sipas kreut të PD, me rritjen e çmimeve Rama do të shfrytëzojë këtë fatkeqësi për të mbushur gropat që ka hapur në buxhet me tenderë korruptivë.

“Ai që është përgjegjësi i gjendjes ku ndodhet vendi, sot kërkon të merremi me batuta vetëm për të hequr vëmendjen nga situata. Qeveria e Ramës refuzon të dëgjojë thirrjet e qytetarëve dhe refuzon planin tonë racional, sepse ai ka planin e tij për të vjedhur shqiptarët. Ne jemi në parlament për këtë betejë dhe asnjë arsye tjetër për t’i kthyer vendin legjitimitetin.

Ai shtoi se kjo qeveri e ka çuar borxhin publik në  80% zyrtarisht, i cili bashkë me PPP-të mund të shkojë edhe 100%.

LEXONI GJITHASHTU:

• Rama shpall emergjencë në furnizimin me energji elektrike: Nesër publikojmë plan masash