Basha fushatë në Tiranë: Do të amnistojmë gjobat abuzive për bizneset

Këtë të martë kryetari i Partisë Demokratike, Lulzim Basha e zhvendosi fushatën e tij në njësinë 3 në kryeqytet.

Gjatë takimeve me qytetarë dhe pronarë biznesesh të vogla, ai shpjegoi planin e opozitës dhe premtoi se gjobat e vëna në mënyrë abuzive ndaj bizneseve do të falen.

“Ulja e taksave, ulja e çmimit të energjisë, naftës dhe fuqizimi i ekonomisë dhe rritja e pagës janë objektivi jonë kryesor. Shqipëria mezi po e pret ndryshimin”, tha kreu i PD.

“Do të hetohen të gjithë ata që kanë bërë këtë punë dhe do të bëhet amnisti për biznesin e vogël dhe familjet. Me 25 t’ia përplasim derën në fytyrë, t’ia mbyllim derën të keqes”, shtoi ai.

Basha u shpreh se pas 25 prillit procesi i rindërtimit do të ecë me ritme të shpejta dhe nuk do të jetë selektiv.

“DS1 e kanë bërë DS5, DS5 e kanë bërë DS1, lojëra nepotizëm, korrupsion. Gjëja e parë që do të bëjmë është rivlerësimi objektiv i dëmit dhe nuk do të vonojmë asnjë minutë për shpërndarjen e parave direkt familjeve që u janë dëmtuar shtëpitë dhe për të nisur ndërtimin e banesave me fondet tona dhe me fondet e BE”, deklaroi z. Basha.

Për të sëmurët me covid, kreu i opozitës premtoi rimbursim të plotë për të gjithë ata që do të kurohen në shtëpi.