Basha i përgjigjet Berishës: Nuk do të ketë referendum partiak për përjashtimin e tij

Në një dalje të shkurtër për median kreu i opozitës Lulzim Basha iu përgjigj akuzave të ngritura nga Sali Berisha, se ai është peng i kryeministrit Edi Rama.

Basha deklaroi se “për 8 vite me radhë Edi Rama më ka akuzuar si kukull të Sali Berishës, dje Sali Berisha më ka akuzuar për peng të Edi Ramës. E para është gënjeshtër, e dyta nuk do të ndodhë kurrë. Të dyja janë dy anë të të njëjtës medalje”.

Sipas Bashës, PD do të vazhdojë të kërkojë largimin e socialistëve nga pushteti.

“Kuvend të Partisë Demokratike për të marrë në shqyrtim vendimet e qeverisë amerikane nuk ka për të patur,” deklaroi Basha prerazi.

Ditën e djeshme, Berisha e akuzoi Bashën e ka dorëzuar sovranitetin e Partisë Demokratike, duke e zbritur partinë “në nivel minimal”. Ish-kreu i PD-së kërkoi falje publike për faktin që ka mbështetur Lulzim Bashën.

Krisjet e marrëdhënieve mes dy liderëve demokratë erdhën më 9 shtator pasi kryetari aktual i PD, Basha vendosi të përjashtojë Berishën nga grupi parlamentar i PD me arsyetimin e shpalljes së tij ‘non grata’ nga SHBA.

Berisha ka hapur një çështje gjyqësore ndaj vendimit të SHBA dhe ndërkohë po organizon takime me degët e partisë në qytete të ndryshme duke kundërshtuar vendimin e Bashës.

LEXONI GJITHASHTU:

Sali Berisha në Fier: Lulzim Basha bën mirë të shkojë andej nga erdhi