Basha në familjen e një socialisti, kryefamiljari: Rama na zhgënjeu, nuk e mbajti premtimin për legalizimet

Kryetari i Partisë Demokratike, Lulzim Basha, ka vizituar një familje të majtë prej vitesh që është bashkuar me Partinë Demokratike në Shkozet të Durrësit.

Kryefamiljari i tha Bashës se zhgënjimi që ka marrë nga qeveria 8 vitet e fundit, për legalizimin e shtëpisë, e ka bërë që të bashkohet me opozitën.

“Unë kam vite socialist, votues dhe anëtar, kam kontribuar jashtë mase. U zhgënjeva jashtë mase për premtimin e pambajtur për legalizimet”, u shpreh kryefamiljari.

Nga ana e tij, kreu i PD e inkurajoi këtë të fundit që më 25 prill të votonte ndryshimin pasi në këtë mënyrë sipas tij do i shërbente familjes së tij dhe vendit.

“Problemin e legalizimeve e kam ngritur që në 2013, duhet të kishim mbyllur ne, nuk e mbyllëm dot, ky erdhi me premtimin për legalizimin falas, por njësoj si me premtimet e tjera nuk e mbajti premtimin.

Më 25 prill është dita juaj, ne kemi ardhur me një plan pune, jo me premtime boshe, që e treguan se ku e çuan vendin. Besnikërinë në radhë të parë e ke ndaj familjes e më pas ndaj Shqipërisë. Edhe po të vazhdosh të jesh me PS, duke votuar për ndryshimin më 25 prill i ke shërbyer familjes tënde, i ke shërbyer Shqipërisë”, u shpreh krydemokrati Basha.