Basha në Tropojë: Zgjedhjet e 25 prillit më të rëndësishmet që nga përmbysja e diktaturës

Lideri demokrat, Lulzim Basha i nisi sot aktivitetet elektorale nga Tropoja, ku deklaroi se zgjedhjet e 25 prillit janë votimet më të rëndësishme që nga përmbysja e diktaturës.

Ai tha se rivendosja e nënprefekturës së Tropojës, do të jetë një nga vendimet e para nëse zgjidhet kryeministër.

“Është koha për një qeveri të të gjithë shqiptarëve, për një qeveri që jo arrogancën, jo shtypjen, jo gjobën, por ndjenjën e vuajtjet, dhimbjen e çdo familjeje ta ndiejë në zemër, sfidat e çdo shqiptari t’i ndiejë si të vetat. Ora që po afron është me e rëndësishmja, nuk ka shans të dytë. Ata që 8 vite e lanë këtë  vend të njerëzve fisnikë pas dore, që jua larguan shërbimet menduan se do të mposhtnin shpirtin e pamposhtur të tropojanit.

Sot ju them se vendimi i parë i qeverisë sime do të jetë deklarimi nënprefekturës së i Tropojës dhe zhvendosja e shërbimeve këtu në Tropojë, shërbime për njerëzit afër njerëzve”, tha kryedemokrati.