Basha në Vaun e Dejës: Asnjë shqiptar nuk do futet në borxh për të shkolluar fëmijët

Kryetari i Partisë Demokratike Lulzim Basha tha sot nga Vau i Dejës se në planin e saj opozita parashikon rritje pagash për mësuesit dhe pedagogët, zgjatjen e orëve të mësimit, kurse për pesë gjuhë të huaja dhe 20 “pro-sesione” online, si dhe anulimin e ligjit të arsimit të lartë.

Basha tha se qeveria aktuale ka lënë pas dore edukimin dhe mirë-arsimimin e të rinjve.

“Paratë e taksave në vend që t’i çonte për fëmijët e shqiptarëve ia ka dhënë një grushti oligarkësh, disave drejtpërdrejtë me tenderë pesëfishin e çmimit dhe në disa raste, siç është rasti Becchetti i ka goditur për mllefe personale,” – tha Basha.

Kryetari i PD-së tha se pas 25 prillit “do ketë rritje pagash, shtrirje të orarit mësimor përtej orës 4 që do të fillojë me zonat rurale dhe qytetet e vogla”. Ai premtoi që brenda katër vitesh të ketë një kampus të ri për profesione të reja ku qeveria do të jetë pjesërisht investitorë.