Basha njeh pogradecarët me planin e Partisë Demokratike për ekonominë dhe taksat

Kryetari i Partisë Demokratike shkoi në Pogradec për të vijuar turin e tij për të vëzhguar ekonominë lokale të banorëve. Në videon e shpërndarë nga Partia Demokratike, sipërmarrësit shprehën vështirësitë e tyre për fuqinë e dobët blerëse që ka ulur xhiron e bizneseve.

“Punojmë 17 orë në ditë, pa asnjë ditë pushim, por shitja ka rënë shumë dhe e kam të vështirë ta paguaj kredinë. Që të mos kem vonesa, detyrohem t’u vonoj paratë fermerëve e t’u hyj në hak”, shprehet një qytetar.

Kjo gjendje sipas kryedemokratit, vjen sepse paratë e taksave nuk shkojnë për qytetarët, por për oligarkët dhe në kohën kur qytetarët kishin më shumë nevojë, qeveria iu dha vetëm 10 euro secilit.

“Tani ishte momenti që këto taksa të vinin tek ju. Sa kanë ardhur tek ju? Me pikatore. Gjysmë paketa. Dhe ato nuk janë ekzekutuar. 10 euro mesatarisht për banor të Shqipërisë”, u shpreh kryedemokrati.

Basha u tregoi pogradecarëve dhe planin e Partisë Demokratike për ekonominë dhe taksat.

“Shqipëria s’mund të jetë e 5 vetave. Shqipëria duhet të jetë e të gjithë shqiptarëve dhe këtë kemi parasysh me taksën e sheshtë 9% për biznesin mbi 140 milionë, me taksën 0.5% të xhiros për të gjithë biznesin e vogël nën 140 milionë lekë. Asnjë tatim, asnjë taksë tjetër, të punojnë lirisht”, tha ai.

Në përfundim, kryedemokrati Basha u tha banorëve të mos presin gjë nga qeveria për situatën me COVID-19, por të marrin masat për t’u mbrojtur vetë.