Ambasadorja Kim në selinë e PD, takimi i parë me Bashën pas përjashtimit të Berishës

Kryetari i Partisë Demokratike, Lulzim Basha ka pritur në selinë e partisë ambasadoren e SHBA në Tiranë, Yuri Kim.

Ky është takimi i parë mes diplomates amerikane dhe kreut të PD, pas vendimit të Bashës për largimin e Sali Berishës nga grupi parlamentar demokrat.

Për herë të fundit ambasadorja Kim u takua me Bashën më 30 korrik. Në dalje nga ai takim në selinë e PD-së ajo shprehu hapur qëndrimin e SHBA kundrejt çështjes “Berisha” ku kërkohej distancimi i demokratëve prej tij.

“Do të ishte një ironi historike […] nëse partia do të hante bar për hir të interesave personale të një njeriu,” – tha Kim në atë dalje për mediat.

Dy muaj më vonë, një ditë para nisjes së legjislaturës së re, kryetari i PD-së, Basha, deklaroi përjashtimin e Sali Berishës nga grupi parlamentar i PD-së deri sa çështja e tij me SHBA të qartësohej.

Prej 19 majit SHBA e ka shpallur Berishën “non grata” për “korrupsion të niveleve të larta” dhe “cenim të demokracisë”. Berisha e ka konsideruar vendimin të pabazuar në prova dhe të motivuar politikisht. Për këtë ai ka nisur padi për shpifje ndaj Sekretarit Amerikan të Shtetit Blinkenin në Gjykatën Korreksionale të Parisit.

Pas vendimit për përjashtimin nga grupi parlamentar i PD-së, Berisha e ka etiketuar Bashën “peng të interesave të kryeministrit Rama”. Ai së fundmi ka nisur një nismë për mbledhjen e Kuvendit Kombëtar të PD-së për të vënë në diskutim postin e Bashës në krye të partisë.

LEXONI GJITHASHTU:

• Basha përjashton Berishën nga grupi parlamentar i PD-së
• Berisha i bindur për mbledhjen e Kuvendit Kombëtar të PD-së
• Basha i përgjigjet Berishës: Nuk do të ketë referendum partiak për përjashtimin e tij
• Berisha kërkon largimin e Bashës nga drejtimi i PD: Ka 8 vjet që humb