Basha: Sot është një ditë e mrekullueshme për demokracinë shqiptare, dilni dhe votoni masivisht

Kryetari i PD-së, Lulzim Basha një orë përpara mbylljes së procesit të votimit u ka bërë thirrje qytetarëve që nuk kanë votuar ende që të shkojnë dhe të votojnë.

“Kemi një orë mundësi për të votuar. Nëse nuk keni votuar akoma, merreni këtë mundësi dhe votoni. Dilni nga shtëpitë tuaja, votoni, për fëmijët tuaj, për familjet tuaja, për të ardhmen e Shqipërisë”, u shpreh z. Basha.

Lulzim Basha falënderoi personat që kanë votuar, ndërsa u bëri thirrje që të nxisin edhe ata që nuk kanë votuar ende.

“Nëse keni votuar, ju faleminderit, trokisni në një derë të dikujt që nuk ka votuar, merreni kërkojini të bëjë detyrën ndaj fëmijëve dhe të ardhmes sonë të përbashkët”, tha kreu i PD-së.

Basha e cilësoi ditën e sotme si një ditë të mrekullueshme për demokracinë shqiptare, ku edhe përsëriti thirrjen për të votuar.

“Është një ditë e mrekullueshme për demokracinë shqiptare, është dita kur të gjithë së bashku do të ndërtojmë një shtëpi të shpresës dhe të ardhmes për të gjithë shqiptarët. Edhe një orë për të marrë fatin tonë në dorë, dilni masivisht dhe votoni”, tha z Basha