Basha takim me të rinjtë: 25 prilli provë për demokracinë në Shqipëri

Kryetari i Partisë Demokratike, Lulzim Basha gjatë një bashkëbisedimi me të rinj finalist të debatit kombëtar të organizuar nga EDYN i ka cilësuar zgjedhjet e 25 prillit si provë për demokracinë në Shqipëri.

“Do të bëjmë gjithçka për ndryshmin dhe ndryshimi duhet patjetër të triumfojë më 25 prill pasi është aspiratë e pothuajse të gjithë shoqërisë pavarësisht bindjeve politike. Edhe ata që mbështesin tradicionalisht partinë në pushtet, sot e kuptojnë që nuk ka më shans tjetër përveçse të ndryshojmë.

Por ndryshimit duhet t’i japim formë, t’i japim thelb. Ndryshimi është rregulli i demokracisë, stanjacioni është rregull i diktaturës. 25 prilli do të konfirmojë edhe njëherë se Shqipëria do të jetë demokraci, s’mund të jetë diktaturë. Nuk mund që për hir të sundimit të kujtdo qoftë të qëndrojnë më vendnumëro apo të bëjnë hapa pas”, u shpreh z. Basha.

Kreu i PD shtoi se për t’i dhënë ndryshimit formë dhe substancë nevojitet bashkëpunim me të rinjtë në mënyrë që t’i jepet fund tranziciont.

“Kemi nevojë për ndihmën tuaj edhe para por edhe pas 25 prillit, për ta kaluar këtë pengesë të fundit dhe për t’i dhënë fund tranzicionit. Fytyruat tuaja, sytë tuaj, shpirt juaj mendja juaj janë  portreti i fundit i tranzicionit. Do të bëj gjithçka që të jetë nesër portreti dhe i Shqipërisë, politike dhe ekonomike”, deklaroi lideri i opozitës.

Ai tha se kriza botërore e pandemisë paraqet dhe një mundësi për Shqipërinë pasi mund të bëhet një alternativë për të zhvendosur nga vendet evropiane zinxhirin e furnizimit duke sjellë investime të huaja në vend.