Pas takimit me Ursula Gaçek, Basha: PD, e vendosur për reformë zgjedhore

Kryetari i Partisë Demokratike, Lulzim Basha priti në një takim shefen e misionit të OSBE/ODIHR në Shqipëri, Ursula Gaçek.

Lulzim Basha në një deklaratë për mediat pas takimit tha se me znj. Gaçek diskutuan mbi rekomandimet parësore të raportit të OSBE/ODHIR, raport i cili sipas kreut të PD-së “fakton masakrën zgjedhore”.

Lulzim Basha u shpreh se Partia Demokratike është e vendosur për një reformë zgjedhore.

“Kemi një grup pune të kryesuar nga Enkeled Alibeaj dhe shumë shpejt do t’i çojmë Kuvendit kërkesën për ngritjen e grupit të punës për reformës zgjedhore”, u shpreh z. Basha.

Mirëpo sipas z. Basha,  nuk mjafton reforma zgjedhore por “një shkundje e thellë që vendi të kthehet në demokraci.

Lulzim Basha i krahasoi zgjedhjet be 25 prillit me “vrasjen e demokracisë në Shqipëri”, duke e krahasuar me Shqipërinë me Bjellorusinë.

“Jam i bindur se ligje të mira ka dhe Lukashenko, por Shqipëria nuk mund të jetë dhe nuk do të bëhet Bjellorusia. Me këtë raport [të OSBE/ODHIR] Shqipëria nuk ka asnjë ndryshim nga Bjellorusia, po t’i heqësh fjalën Shqipëri raportit, është Bjellorusi”, u shpreh Lulzim Basha.

Kreu i PD-së tha se arsyeja e vetme pse Partia Demokratike është në Parlament, është rikthimi i legjitimitetit në vend.

Sakaq, gjatë ditës së sotme misioni i ODIHR ka zhvilluar takime edhe me sekretarin e përgjithshëm të Partisë Socialiste, Damian Gjiknuri.

LEXONI GJITHASHTU:

• SHBA, BE dhe OSBE mesazh urimi pas betimit të qeverisë ‘Rama 3’