Basha takime në njësinë 8, në lagjen e fëmijërisë: Dilni masivisht në votime

Kryetari i Partisë Demokratike, Lulzim Basha, ka zhvilluar këtë të premte takime me qytetarë dhe biznese në njësinë 8 në kryeqytet. Ai dëgjoi nga afër problematikat e tyre dhe u kërkoi të dalin masivisht në zgjedhje.

Ditën e parë të fushatës elektorale Lulzim Basha e nisi nga lagjja e tij e vjetër ku ka kaluar fëmijërinë. Takimin e nisi me tregtarët e rrugës së Dibrës, ku u njoh me problematikat e tyre.

Gjatë një takimi që zhvilloi me një grup të rinjsh, votues për herë të pare, Basha u shpreh se rinia do ta përcaktojë fatin e këtyre zgjedhjeve, ashtu siç ka bërë në momentet më kritike të vendit.

“Kjo është një betejë që do ta përcaktojë rinia shqiptare, siç ka përcaktuar të gjitha ndryshimet e mëdha dhe kjo është betejë për ndryshim, nuk është thjesht betejë për zëvendësim. Nga ky ndryshim do të varet rruga evropiane e Shqipërisë”, deklaroi z. Basha.

Gjatë një takimi me ish-pronarë, ai bëri thirrje që qytetarët të dalin masivisht në votime.

“Gjëja e parë që do të bëjmë është që do ta kthejmë qeverinë në funksion të njerëzve. Prandaj kjo betejë vendos shumicën dërrmuese të shqiptarëve përballë një pakice absolute. Ndaj gjëja më e rëndësishme është që shumica të dalë të votojë pasi ndryshimi bëhet me votë”, tha z. Basha.