Basha thirrje qeverisë të mos heshtë për situatën në Kosovë

Kryetari i PD-së, Lulzim Basha, ka kërkuar nga qeveria e Kryeministrit Edi Rama që të mos heshtë përballë situatës që po kalon Kosova.

Përmes një postimi në Facebook, Basha shprehu mbështetje për qeverinë e Albin Kurtit në përpjekjet e saj për të vendosur reciprocitet në targat me Serbinë.

Ai tha se aktet e dhunshme të ndodhura së fundmi në veri janë frymëzuar nga Beogradi zyrtar dhe se këto synojnë destabilizimin e Kosovës dhe rajonit.

“Detyra e Shqipërisë, edhe si vend anëtar i NATO-s, nuk është të heshtë por të përdorë të gjithë mekanizmat e saj diplomatikë për të ndihmuar në zgjidhjen e kësaj situate. Nuk mund të tolerohen tanket dhe avionët ushtarakë që mësyjnë kufijtë e Kosovës, duke kërcënuar paqen dhe sigurinë e të gjithë rajonit,” – tha Basha.

Paralelisht në Vlorë, ish-kryeministri Sali Berisha, kritikoi qasjen e Bashës në raport me agjendën e jashtme të kryeministrit Rama për sa i përket rajonit. Ai tha se ai ka heshtur përballë projekteve të rrëzikshme si “Minishengeni” apo dhe “Ballkani i Hapur”.

“Ju pyes ju: Keni dëgjuar PD të thotë një fjalë për “Minishengenin për Ballkanin e Hapur”, ja ku janë rezultatet miqtë e mi, rezultatet e Minishengenit janë tanket në kufijtë e Kosovës, janë bombarduesit e Beogradit në kufijtë e Kosovës, dhe heshtja e varrit ndaj projekteve të Soros dhe Edi Ramës, por mjerisht edhe e ish-kryetarit të PD Lulzim Basha. Ne nuk jemi komb jetim,” – tha Berisha, referuar situatës në veri të Kosovës.