Basha u prezanton qytetarëve të Laçit propozimet e PD-së për rimëkëmbjen ekonomike

Kryetari i Partisë Demokratike, Lulzim Basha vijoi të enjten takimet me qytetarët dhe sipërmarrësit në qytetin e Laçit.

Ata u ankuan për papunësi, rënie të aktivitetit ekonomik si pasojë e pandemisë dhe abuzime me programin e rindërtimit. Sipas tyre bashkë me ndërtesat e dëmtuara po shemben “pa asnjë paralajmërim” edhe disa të padëmtuara.

Basha u shpreh se opozita ka paraqitur programin e saj të zgjidhjes për situatën, program që mund të parandalojë “shtimin me 40% të listës së të papunëve”.

Prej disa javësh kryetari i PD-së, Basha po zhvillon takime me qytetarët dhe sipërmarrësit, kjo me synimin për t’i ndërgjegjësuar ata për propozimet e opozitës.

PD ka propozuar:

• Çek 1,000 euro për biznesin e vogël për të lehtësuar situatën e 6 muajve të ardhshëm;
• Pagë mujore 16,000 lekë për ata që kanë humbur vendin e punës
• Pagë mujore 20,000 lekë për çdo punonjës që biznesi rikthen në punë gjatë 6 muajve të ardhshëm;
• Shtesë 20,000 lekë pensioneve për shpenzime shëndetësore gjatë 6 muajve të ardhshëm;

Demokratët këmbëngulin se propozimet e tyre mund të nxisin konsumin me mbi 300 milion euro dhe të zbusin ngërçin e mungesës së blerjeve apo aktivitetit ekonomik në tërësi shkaktuar nga pandemia. Në këtë mënyrë ata thonë se do të mund t’i garantojnë vendit rimëkëmbjen ekonomike.