Basha u shpjegon krerëve të degëve vendimin për përjashtimin e Berishës

Kryetari i Partisë Demokratike, Lulzim Basha mblodhi paraditen e së shtunës krerët e degëve të partisë.

Gazetari i Euronews Albania Ardit Hoxha raportoi se në mbledhjen që zgjati rreth 1 orë e 30 minuta kryetari Basha ka dhënë shpjegime para Kolegjit të Kryetarëve lidhur me vendimin e marrë dy ditë më parë për të përjashtuar Sali Berishën nga grupi parlamentar.

Për kryetarët lind detyra t’u shpjegojnë anëtarëve të thjeshtë këtë vendim shumë të vështirë që ka sjellë përçarje në PD.

Në mbledhje është diskutuar gjithashtu koordinimi i strukturave sa i takon organizimit të partisë.

Seanca e parë të Kuvendit një ditë më parë reflektoi pakënaqësinë e një pjesë të mbështetësve dhe deputetëve të PD ndaj vendimit të kreut të kësaj partie, që iu bashkuan me ovacione ish-kryeministrit Berisha teksa mbërriti në kuvend.

Vendimi i Bashës u përshëndet menjëherë nga ambasada e SHBA. Përmes një deklarate për mediat ambasada amerikan thekson se PD-ja ka guximin të shkëputet nga e kaluara për të ndërtuar të ardhmen dhe se vendimi i Bashës meriton respekt.

Ndërkohë, në një fjalim të shkurtër të mbajtur para kuvendit të enjten ish-kreu i PD, Sali Berisha hodhi akuza ndaj kryedemokratit Lulzim Basha dhe kryeministrit Edi Rama.

“Mund të blesh dhe të shesësh Edi Rama, Lulzim Bashën, por kurrë PD dhe demokratët shqiptarë. Kjo është përfundimtare. Je i pashpresë me aktet prapa shpine që ke realizuar me Lulzim Bashën”, tha Berisha.

Në daljen e tij nga Kuvendi i Shqipërisë Berisha përmendi përsëri se garanton që kjo është një marrëveshje midis Ramës dhe Bashës.

“Çfarë date është pakti do ia lë historianëve, por garantoj se ajo që ndodhi është marrëveshje midis Ramës dhe Bashës në kurriz të zgjedhësve shqiptar dhe duhet çmontuar”, – u shpreh ish-kryeministri.

Kryetari i PD-së Lulzim Basha njoftoi mbrëmjen e së enjtes përjashtimin e Sali Berishës nga grupi parlamentar i PD-së deri sa të zbardhet në rrugë ligjore vendimi për padinë e ngritur nga ish-kryeministri ndaj Sekretarit amerikan të Shtetit, Antony Blinken.

LEXONI GJITHASHTU:

• ‘Rama mund të blejë Bashën, por jo PD-në’, Berisha pritet me ovacione para Kuvendit
• Berisha për Euronews Albania: Aksioni do vazhdojë, me Lulin s’ka fitore, vetëm pazare