Bashkia, tender për projektimin e teatrit të ri

Një ditë mbas shembjes së Teatrit Kombëtar, Bashkia e Tiranës publikoi projektin e Bjarke Ingels, në bazë të të cilit do të ndërtohej teatri i ri.

Mirëpo këtë të premte, bashkia ka hapur një procedurë për projektin e Teatrit të ri Kombëtar me një fond limit prej rreth 60 milionë lekësh.

Rreth dy muaj pas prishjes së godinës së Teatrit Kombëtar, Bashkia e Tiranës ka shpallur tenderin për “Studim-Projektim “Ndërtim i Teatrit Kombëtar”, duke konfirmuar në këtë mënyrë se vendimi për ndërhyrjen me forcën e policisë dhe të fadromave është kryer pa një plan konkret për rindërtimin e tij.

Nisja e kësaj procedure mund të hasë në disa probleme. Vetë Bashkia ka deklaruar se teatri do të ndërtohet sipas projektit të Bjanke Ingelsit. Vetë Ingels e kreu studimin me porosi të kompanisë ‘Fusha’, e cila nuk është më zhvilluese e këtij projekti.

Tashmë nuk dihet nëse Bashkia do të paguajë këtë projekt nga taksat e qytetarëve për të shlyer kompaninë për një punë që nuk u lejua ta bënte, apo nëse bëhet fjalë për një projekt të ri.

Ndërkohë, janë ngritur edhe disa padi penale për prishjen e Teatrit Kombëtar dhe kësisoj ka dhe një rrezik financiar nëse hapen procedura prokurimi, sepse mund të shpenzohen para publike në rast se mund të humbet përballja në një proces gjyqësor.