Bashkimi Evropian miraton injeksionin e ri për parandalimin e HIV-it

Komisioni Evropian ka miratuar shitjen e një injeksioni të ri nga kompania “Gilead Sciences” për parandalimin e infeksionit HIV, i cili jepet dy herë në vit, njoftoi sot kompania.

Ky injeksion, i cili u miratua nga KE në qershor, do të shitet në Evropë me emrin “Yeytuo”, dhe përveç 27 shteteve anëtare të BE-së, do të jetë i disponueshëm edhe në Norvegji, Lihtenshtajn dhe Islandë, raporton Reuters.

Gilead do të duhet të përcaktojë kushtet e çmimeve dhe të rimbursimit me sistemet shëndetësore në secilin vend përpara se të lëshohet injeksioni.

Kompania tha se kërkesa për miratimin e injektimit në BE u shqyrtua sipas një afati të përshpejtuar dhe iu dha një vit shtesë mbrojtjeje të tregut.

Deklarata e Gilead shtoi se një kërkesë për shqyrtim rregullator të Lenacapavir, i cili administrohet dy herë në vit, për profilaksinë para ekspozimit (PrEP) është paraqitur te autoritetet në Australi, Brazil, Kanada, Afrikën e Jugut dhe Zvicër, dhe se kompania po përgatit dorëzime në Argjentinë, Meksikë dhe Peru.

Injeksioni u miratua gjithashtu në SHBA në qershor nën emrin “Yeztugo”, dhe çmimi i listuar për këtë ilaç në Amerikë është më shumë se 28,000 dollarë në vit.

Komisioni Evropian ka miratuar ilaçin PrEP për të zvogëluar rrezikun e HIV-it të transmetueshëm seksualisht tek të rriturit dhe adoleshentët me rrezik në rritje për t’u prekur nga virusi vdekjeprurës.

LEXONI GJITHASHTU:

• Një person i vdekur, 19 raste të reja me HIV gjatë këtij viti në Kosovë
• Raporti: Hiv vazhdon përhapjen, 1.3 mln raste të reja në 2024