Baton Haxhiu: SHBA i kërkoi Britanisë së Madhe të shpallë ‘non grata’ Berishën

Për analistin Baton Haxhiu, Shtetet e Bashkuara të Amerikës kanë ndikuar në vendimin e Britanisë së Madhe për të shpallur ‘non grata’ ish-kryeministrin dhe kryetarin e Partisë Demokratike, Sali Berisha.

Në një intervistë për “Euronews Albania”, Haxhiu u shpreh se SHBA-të janë aleati i madh i Britanisë së Madhe dhe i kanë kërkuar që të vendosin sanksione ndaj Berishës.

Sipas tij, SHBA-të nuk arritën sukses që të shkëputin elektoratin demokrat nga Berisha pas shpalljes ‘non grata’ nga Departamenti i Shtetit, në maj të vitit 2021.

“Shtetet e Bashkuara të Amerikës, si duket nuk kanë pasur sukses të bindin foltoren dhe foltoret se diçka serioze po ndodh në politikën shqiptare dhe nuk e durojnë ata përçmimin që u bëhet atyre për vendimin që morën. Me siguri, nuk e kanë gjetur hapësirën evropiane apo të shteteve evropiane mjaftueshëm për ta përkrahur idenë e tyre, për arsye se si koncept shtetet evropiane e kanë të vështirë termin ‘non grata’.

Dhe e kanë gjetur Britaninë sidomos për faktin se ajo është jashtë Komunitetit Evropian. Britania e Madhe është aleat i vjetër i Shteteve të Bashkuara të Amerikës dhe kjo është një goditje e cila me siguri është kërkuar nga aleati i madh, Shtetet e Bashkuara të Amerikës”, sipas Haxhiut.

Sali Berisha deklaroi këtë të premte se i është ndaluar hyrja në territorin e Britanisë së Madhe. Sipas tij, vendimi është në vazhdën e shpifjeve të sponsorizuara nga Soros.

Arsyetimi që Berisha kishte marrë për këtë vendimi ishin lidhjet me grupet e krimit të organizuar dhe kriminelë të cilët kanë paraqitur një rrezik për sigurinë publike në Shqipëri dhe Britani dhe korrupsioni.

Pavarësisht se vendimi është konfidencial, Berisha theksoi se e bëri publik për qytetarët shqiptarë me të cilët ka qenë gjithnjë i vërtetë.

LEXONI GJITHASHTU

• Për lidhje me krimin s’jam akuzuar as nga kundërshtarët, pretendon Berisha
• Berisha: Më kanë ndaluar hyrjen në Britaninë e Madhe