BE embargo të pjesshme naftës ruse, ndalohet importi përmes detit

Gjatë samitit të fokusuar për të ndihmuar Ukrainën, liderët e Bashkimit Evropian ranë dakord që të bllokojnë më shumë se 2/3 e importit të naftës ruse.

Embargoja e pjesshme përfshin vetëm naftën ruse të sjellë përmes detit, duke lejuar kështu importin e përkohshëm të shpërndarë përmes linjave të tubacioneve.

Presidenti i Këshillit Evropian bëri me dije marrëveshjen e arritur duke theksuar se po ndërpritet një nga burimet e fuqishme të makinerisë së luftës ruse

“Për të qenë të qartë, vendimi prek 75% të naftës ruse dhe kjo do të thotë se përpara fundit të vitit  rreth 90% e naftës së importuar ruse do të jetë pjesë e embargos”, theksoi Charles Michel.

“Elementë të tjerë në paketën e sanksioneve  janë gjithashtu të rëndësishëm, sikundër është largimi i shpejtë i SBERBANK. Kompanitë evropiane janë të ndaluara të sigurojnë anijet ruse. Ndalimi për kompanitë ruse përfshijnë  një gamë të tërë shërbimesh biznesi dhe imponon pezullimin e transmetimit në Bashkimin Evropian të tre mediave të tjera shtetërore ruse”, tha Presidentja e Komisionit Europian, Ursula Von der Leyen.

Më herët, presidenti i Ukrainës, Volodimir Zelenski u bëri thirrje liderëve që t’i japin fund “argumenteve të brendshme” që pengojnë ndalimin e naftës dhe paketën e gjashtë të sanksioneve.

Kryeministri hungarez Viktor Orban bllokoi një ndalim total të naftës  pasi vendi i tij pa dalje në det merr më shumë se 60% të naftës nga Rusia nëpërmjet tubacionit Druzhba të epokës sovjetike.

Ky është një samiti dyditor dhe pavarësisht vonesës së bisedimeve, liderët e BE-së do të kthehen për diskutuar çështje të tjera të lidhura me Ukrainën, si siguria ushqimore.

LEXONI GJITHASHTU:

• Europa Lindore i bashkohet nismës për të reduktuar varësinë nga gazi rus
• Greqia përshpejton hapat për pavarësim nga gazi rus