BE dhe SHBA kundër kryeprokurorit të ri të Kosovës

Organizatat që merren me monitorimin e sistemit të drejtësisë kanë reaguar pas votimit unanim nga Këshilli Prokurorial i Kosovës për zgjedhjen e Blerim Isufaj si kryeprokuror i shtetit.

Reagimit i janë bashkuar edhe ambasadorët e Shteteve e Bashkuara dhe Bashkimit Evropian, të cilët kanë kritikuar procedurën e përzgjedhjes së kandidatit për kryeprokuror të shtetit.

Nëpërmjet një reagimi të përbashkët, Instituti i Kosovës për Drejtësi, Grupi për Studime Juridike dhe Politike dhe Lëvizja FOL, thanë se që prej mesit të marsit kanë publikuar një raport për shkelje gjatë procesit vlerësues të kandidatëve për kryeprokuror.

Ata kanë thënë se paneli vlerësues i kishte vlerësuar kandidatët në mënyrë të pabazuar “duke cenuar meritokracinë e procesit” dhe rekomandojnë që i tërë procesi i përzgjedhjes dhe emërimit të kryeprokurorit të ri të shtetit të anulohet dhe të përsëritet.

Sipas procedurave, nominimi i Blerim Isufajt duhet të dekretohet nga presidentja e Kosovës, Vjosa Osmani.

LEXONI GJITHASHTU:

• Të dënohen përgjegjësit e gjenocidit serb në Kosovë, thotë Kurti
• Punonjësit e shëndetësisë në Kosovë protesta për kushtet e punës