BE dhe SHBA premtojnë më shumë sanksione kundër Rusisë

Zyrtarët më të lartë të Bashkimit Evropian thanë se blloku do të vendosë më shumë sanksione kundër Rusisë dhe atyre që janë të përfshirë në njohjen e dy rajoneve separatiste të Ukrainës lindore.

Njoftimi erdhi pasi presidenti rus Vladimir Putin nënshkroi një dekret për të njohur zyrtarisht pavarësinë e dy rajoneve të kontrolluara nga rebelët në Ukrainën lindore.

Në një deklaratë të përbashkët të hënën në mbrëmje, presidentja e Komisionit të BE-së Ursula von der Leyen dhe presidenti i Këshillit Charles Michel thanë se njohja ishte “një shkelje e hapur e ligjit ndërkombëtar”.

Dyshja shtuan se BE-ja do të reagojë me sanksione dhe përsëritën mbështetjen e palëkundur për pavarësinë, sovranitetin dhe integritetin territorial të Ukrainës brenda kufijve të saj të njohur ndërkombëtarisht.

Shtëpia e Bardhë tha se Presidenti Biden do të urdhërojë gjithashtu sanksione të reja dhe e quajti njoftimin e Putinit një “shkelje të hapur të angazhimeve ndërkombëtare të Rusisë”.

Sanksionet amerikane do të ndalojnë investimet e reja, tregtinë dhe financimin në dy rajonet separatiste të Ukrainës të njohura nga Putin,  të ashtuquajturat Republika Popullore të Donetskut dhe Luhanskut.