BE miraton ligjin e parë në botë për inteligjencën artificiale 

Shtetet anëtare të Bashkimit Evropian miratuan sot një ligj që synon harmonizimin e rregullave për inteligjencën artificiale, të ashtuquajturin Akti i Inteligjencës Artificiale.

Është akti i parë i këtij lloji në botë, i cili mund të vendosë standarde globale për legjislacionin për inteligjencën artificiale, sipas njoftimit të Këshillit të BE-së.

Ligji i ri synon të inkurajojë aktorët privatë dhe publikë që të zhvillojnë dhe adoptojnë sisteme të sigurta dhe të besueshme të inteligjencës artificiale në të gjithë tregun e vetëm të BE-së.

Në të njëjtën kohë, ai kërkon të sigurojë respektimin e të drejtave themelore të qytetarëve të BE-së dhe të inkurajojë investimet dhe inovacionin në fushën e inteligjencës artificiale në Evropë.

Akti i AI zbatohet vetëm për fushat që mbulohen nga ligji i BE-së dhe parashikon përjashtime në rastin e sistemeve të përdorura ekskluzivisht për qëllime ushtarake dhe mbrojtëse, si dhe për qëllime kërkimore.

Sipas ligjit, forma të ndryshme të inteligjencës artificiale kategorizohen sipas rrezikut.

Kështu, siç u tha, sistemet e inteligjencës artificiale që përfaqësojnë një rrezik të kufizuar do t’i nënshtroheshin detyrimeve shumë të buta për sa i përket transparencës, ndërsa sistemet me rrezik të lartë do të miratoheshin me kusht që të përmbushin një sërë kërkesash dhe detyrimesh për të hyrë në tregun e BE-së.

Sistemet e inteligjencës artificiale, të tilla si, për shembull, manipulimi kognitiv i sjelljes dhe vlerësimi social do të ndalohen në BE për shkak të rrezikut të papranueshëm.

LEXONI GJITHASHTU:

• Ana e errët e inteligjencës artificiale, si ndikon në rritjen e krimeve kibernetike
• Blinken: SHBA dhe Kina do të mbajnë bisedimet e para për inteligjencën artificiale