BE përgatit hua për Ukrainën nga fitimet e aseteve të ngrira ruse

Bashkimi Evropian po përgatit një hua të re për Ukrainën, e cila do të mbështetet në të ardhurat nga asetet e ngrira të Bankës Qendrore Ruse, por pa prekur pronësinë ruse mbi këto asete.

Komisioneri evropian për Ekonominë, Valdis Dombrovskis, e bëri të ditur këtë të premte gjatë takimit informal të ministrave të Financave të BE-së (Ecofin) që po zhvillohet në Kopenhagë.

Sipas tij, kjo hua do të ketë karakterin e një “riparimi lufte”, duke ndjekur linjën e projektit që presidentja e Komisionit Evropian, Ursula von der Leyen, prezantoi më herët në fjalimin e saj për gjendjen e Bashkimit.

“Jemi duke punuar për të përcaktuar kohën dhe shumën e huas,” tha Dombrovskis, duke shtuar se ky model mund të përdoret si shembull edhe nga vendet e tjera të G7-ës, të cilat gjithashtu kanë ngrirë asete ruse pas agresionit ndaj Ukrainës.

Sipas propozimit, Ukraina do të jetë e detyruar të kthejë huan vetëm pasi të marrë kompensimet e luftës nga Rusia, në përputhje me përgjegjësinë e saj për sulmin ndaj një vendi sovran.

Megjithatë, tematika nuk është pjesë e agjendës zyrtare të takimit të Ecofin, siç kishte konfirmuar më herët edhe presidenca daneze e radhës së BE-së.

LEXONI GJITHASHTU:

• Kremlini do të ngadalësojë ekonominë ruse dhe kjo mund të shkaktojë probleme
• Rumania dënon shkeljen e hapësirës ajrore të saj nga një dron rus