BE reagon për Kodin Penal: Të shqetësuar për lirinë e medias

Bashkimi Evropian ka reaguar për Euronews Albania ndaj projekt-ndryshimeve në Kodin Penal të Shqipërisë, duke shprehur shqetësime serioze për ndikimin që disa nga propozimet mund të kenë mbi të drejtat e qytetarëve, lirinë e shprehjes, si dhe lirinë e medias.

Në deklaratën e bërë publike në kuadër të negociatave për anëtarësim, BE nënvizon se Shqipëria duhet të japë përparësi ndryshimeve që janë në përputhje me acquis të BE-së dhe që adresojnë kriteret ndërmjetëse të Grupkapitullit 1, përfshirë:

1. Dekriminalizimin e shpifjes,

2. Harmonizimin me ligjet evropiane për trafikimin e drogës, trafikimin e qenieve njerëzore,

3. Parandalimin e abuzimit ndaj fëmijëve,

4. Kontrollin e armëve të zjarrit, dhe

5. Luftën kundër pastrimit të parave.

BE bën të ditur se aktualisht është në proces konsultimi për këto ndryshime prioritare, të cilat lidhen drejtpërdrejt me përmbushjen e detyrimeve të Shqipërisë në kuadër të negociatave për anëtarësim.

Ndërkohë, Brukseli thekson nevojën për kujdes të shtuar në lidhje me një paketë më të gjerë ndryshimesh në Kodin Penal, e cila është tashmë në fazën e konsultimit publik. Sipas BE-së, kjo reformë duhet të zhvillohet përmes një procesi gjithëpërfshirës, që angazhon të gjitha institucionet kryesore të drejtësisë, shoqërinë civile dhe aktorët e medias.

“Jemi veçanërisht të shqetësuar për disa amendamente të propozuara nga grupi i punës që mund të kenë ndikim negativ mbi të drejtat e qytetarëve, lirinë e shprehjes dhe lirinë e medias. Këto dispozita nuk janë të përafruara me standardet e BE-së,” thuhet në reagimin e Bashkimit Evropian.

BE shton se shqetësimet e ngritura nga aktorë të drejtësisë, shoqëria civile dhe përfaqësues të mediave duhet të merren seriozisht dhe të reflektohen në versionin përfundimtar të ndryshimeve, në përputhje me angazhimet e Shqipërisë për anëtarësim.

LEXONI GJITHASHTU:

• A ka kryer krim Safet Gjici? Spahiu: Çfarë parashikon Kodi Penal për rastin
• Avokati i Popullit: Kodi Penal s’mund të ndryshohet në situatë të jashtëzakonshme