BE-Shqipërisë: Vendosni kufi për pagesat me para në dorë, nxit evazionin

Bashkimi Europian i kërkon Shqipërisë të vendosë tavan për pagesat që kryhen me para në dorë. Ky kufi do të luftojë pastrimin e parave dhe evazionin që bëjnë njerëzit apo bizneset.

Pagesat me para në dorë janë dominuese në ekonominë shqiptare, edhe pse në vitet e fundit po vërehet një rritje e pagesave me karta bankare. Përdorimi i lartë i parasë fizike në transaksionet ekonomike favorizon informalitetin dhe krimin financiar, përfshirë këtu pastrimin e parave nga aktivitetet kriminale. Për këtë arsye, Komisioni Europian i rekomandon Shqipërisë vendosjen e një shume tavan për pagesat me para fizike.

Në raportin e fundit, KE vlerëson se vendi ynë është pjesërisht në përputhje me kuadrin e Bashkimit Europian për sa i përket hetimit të pastrimit të parave

Një kërkesë e ngjashme për vendosjen e një tavani për pagesat cash është shprehur prej vitesh edhe nga Shoqata Shqiptare e Bankave.

Sipas saj, vendosja e një tavani për pagesat cash të individëve do të ndihmonte në uljen e evazionit fiskal dhe do të ndihmonte në luftën kundër pastrimit të parave dhe krimit financiar në përgjithësi.

Sipas të dhënave nga Banka e Shqipërisë, në mesin e këtij viti numri i kartave bankare aktive arriti në 1.4 milionë, në rritje me 2% që nga fillimi i vitit.