Begaj dekreton ndryshimet në qeveri: Shkarkohet Margariti, emërohet Blendi Gonxhja

Presidenti i Republikës, Bajram Begaj, me propozim të Kryeministrit Edi Rama, dekretoi këtë të premte shkarkimin e Elva Margariti nga detyra e Ministres së Kulturës, si dhe shkarkimin Ervin Metes nga detyra e Ministrit të Financave dhe Ekonomisë.

Gjithashtu, Presidenti i Republikës, emëroi Ervin Meten në detyrën e Ministrit të Financave si edhe Blendi Gonxhen si Ministër i Ekonomisë, Kulturës dhe Inovacionit.

Vendimi për krijimin e një ministrie të re, e cila do të përfshijë ekonominë, kulturën dhe inovacionin në një dikaster të vetëm, u bë publik të hënën nga kryeministri Rama.

Kreu i qeverisë i cilësoi ndryshimet si nevojë strategjike të kësaj faze të re të zhvillimit, duke krijuar një ministri të re e cila do të bashkojë në një të vetme pjesët që aktualisht funksionojnë të ndara në ministritë respektive të Financave, Ekonomisë dhe të Kulturës.

Rama theksoi se në krye të kësaj ministrie do të vendoset ish-drejtori i DPSHTRR, Blendi Gonxhja, për shkak dhe të performancës të mëparshme të treguar si menaxher.

LEXONI GJITHASHTU:

• Ndryshime në qeveri, Blendi Gonxhja emërohet ministër i Ekonomisë dhe Kulturës
• U emërua ministër, reagon për herë të parë Blendi Gonxhja: Sfidë dhe përgjegjësi!