Artisti i njohur italian Fabrizio Bellomo sjell në Tiranë ekspozitën personale të titulluar “Abito Mari”.

E hapur në Galerinë Artit Bashkëkohor në Tiranë “GOCAT”, ekspozita që vjen në kuadër të javës kulturore italiane, shfaqet si një udhëtim artistik dhe reflektues mbi peizazhin bashkëkohor të rajonit të Mesdheut.

Përmes veprave të tij, Bellomo eksploron marrëdhëniet komplekse dhe shpesh të padukshme mes njeriut dhe mjedisit përreth, duke vendosur në qendër të vëmendjes ndërthurjet kulturore dhe historike që lidhin Pulian, Kalabrinë dhe Shqipërinë.

Për kuratorët e ekspozitës, Ardian Isufi dhe Elton Koritari, “Abito Mari” është një hetim artistik nëpër skutat dhe periferitë e Italisë dhe Shqipërisë, që pasqyrojnë eksperienca dhe përvoja paralele.

Ekspozita që do të qëndrojë e hapur deri më 12 korrik, shërben si një hapësirë për dialog dhe përsiatje mbi identitetin, përkatësinë dhe ndikimet e ndërsjella kulturore në këtë hapësirë gjeografike të pasur me histori dhe ndryshime dinamike.

Më këtë projekt, Fabrizio Bellomo është ftuar të marrë pjesë në Ekspozitën Ndërkombëtare të Arkitekturës së Bienales së 16-të në Venecia.

LEXONI GJITHASHTU:

• Përtej kufirit të formave, piktori Anrol Shukulli vjen me ekspozitën me portrete
• Ekspozitë e rrallë dixhitale për Egjiptin e lashtë në Londër