Ben Gvir lutet në objektin e kultit, protestojnë myslimanët: Do rrisë tensionet

Ministri izraelit i ekstremit të djathtë, Itamar Ben Gvir, vizitoi dhe bëri lutje në objektin më të rëndësishëm të kultit në Jerusalem, kompleksin Al-Aksa, duke nxitur një valë kritikash nga liderët rajonalë dhe rritur frikën për përshkallëzim të mëtejshëm të tensioneve.

Veprimi provokues erdhi teksa sulmet izraelite në Rripin e Gazës vazhdojnë, me të paktën 33 palestinezë të vrarë ditën e diel, teksa i afroheshin pikave të shpërndarjes së ndihmave një ngjarje që shtoi akoma më shumë kritikat ndaj shtetit hebre.

Kompleksi është vendi më i shenjtë i judaizmit dhe besohet se në të ndodhen tempuj të lashtë. Myslimanët e quajnë atë Vendi i Shenjtë Fisnik, që sot është shtëpi e xhamisë Al-Aksa, vendi i tretë i shenjtë për islamikët.

Vizitat e zyrtarëve izraelitë konsiderohen një provokim në botën arabe dhe lutjet që ata bëjnë aty përbëjnë shkelje të status quo-së së gjatë.

Ministri Gvir, përgjegjës për Sigurinë Kombëtare, e kreu vizitën pasi Hamasi publikoi një video ku shfaqej një peng izraelit i mbajtur në Gaza, i dobësuar dhe në gjendje jo të mirë shëndetësore.

Videoja shkaktoi zemërim në Izrael dhe rriti presionin ndaj kryeministrit Netanyahu për të arritur një marrëveshje për të kthyer në shtëpi pengjet e mbetura.

Rreth 50 persona mbahen ende peng në Gaza, 20 prej të cilëve besohet se janë ende gjallë. Ata u rrëmbyen pas sulmit të 7 tetorit 2023 ndaj Izraelit, kur u vranë 1.200 persona.

Në një reagim të fundit, lëvizja islamike deklaroi se do t’i dorëzojë pengjet vetëm nëse shteti hebre ndalon fushatën e bombardimeve.

LEXONI GJITHASHTU: 

• Kriza në Gaza, Trump: Duam që njerëzit të ushqehen, por nuk po ndodh gjenocid
• Mbi 180 të vdekur në Gaza në 24 orët e fundit, për shkak të urisë