Berisha e cilëson antikushtetuese kandidimin e Bajram Begajt për president

Kryetari i Partisë Demokratike, Sali Berisha e cilëson si antikushtetues dhe precedent të rrezikshëm për vendin e demokracinë, kandidaturën e Bajram Begajt për President të Republikës.

Përmes një postimi në rrjetet sociale, Berisha shprehet se propozimi i shefit të Shtabit të Përgjithshëm të Ushtrisë shqiptare për postin e presidentit është një shkelje flagrante e Kushtetutës.

Berisha citon nenin 167 të Kushtetutës, që përcakton se ushtarakët e shërbimit aktiv nuk mund të zgjidhen, emërohen në detyra të tjera shtetërore, ose në veprimtari politike.

Sipas Berishës, nëse Begaj do të kishte ambicie politike duhej të jepte dorëheqjen kohë më parë, në mënyrë që të angazhohej në politikë.

Sot Partia Socialiste zyrtarizoi kandidaturën për president, gjeneral Bajram Begaj që deri dje mbante postin e shefit të shtabit të përgjithshëm të Forcave të Armatosura.

Më herët, përmes një mesazhi të bërë publik gjenerali Bajram Begaj tha se kishte depozituar dorëheqjen nga posti i tij pranë ministrit të Mbrojtjes dhe presidentit.

LEXONI GJITHASHTU

• Meta i hap rrugë Bajram Begajt drejt Presidencës, firmos lirimin nga FA
• ‘Shqipëria mbi gjithçka’, mesazhi i Begajt para se të votohet si president