Berlusconi i pafajshëm, mbyllet pas 6 vitesh proces çështja e festave private

Ish-kryeministri i Italisë, Silvio Berlusconi është shfajësuar të mërkurën nga akuza e korrupsionit të dëshmitarëve në lidhje me çështjen e festave të tij private.

Miliarderi 86-vjeçar akuzohej se paguante vajza të reja dhe persona të tjerë për të dhënë dëshmi të rreme mbi netët e kaluara në vilën e tij në Arkore.

Në të njëjtin proces u shfajësuan edhe 28 të pandehur të tjerë, mes të cilëve balerina marokene Karima el Mahroug, e njohur ndryshe si Ruby, prej nga mori emrin edhe procesi.

Berlusconi është përballur me shumë çështje gjyqësore. Në rastin “Rubi”, senatori i së djathtës fitoi në apel kundër dënimit për pagesa në këmbim të favoreve seksuale me një prostitutë në moshë të mitur.

Si ish-kryeministri, ashtu edhe balerina marokene, asokohe minorene, mohuan të dy të kishin kryer marrëdhënie seksuale.

Në proceset e vazhdueshme, Berlusconi mohoi gjithashtu çdo shkelje, duke akuzuar prokurorët për orkestrimin e një hakmarrjeje politike në dëm të tij. Ai insistoi gjithashtu se festat në vilën e tij kishin qenë vetëm mbrëmje elegante.

I vetmi gjyq që përfundoi me dënimin e tij ka qenë ai për mashtrime financiare në 2013-n. Por për shkak të moshës së thyer ai shmangu burgun dhe kreu vetëm një vit shërbim në komunitet.

LEXONI GJITHASHTU:

• Dështon ekstradimi i Adriatik Llallës, ish-kryeprokurori merr azil politik në Itali
• Beti: Polakët, çekët dhe italianët blejnë më shumë prona në Shqipëri