Vincenzo Del Monaco zëvendëson Bernd Boschardtin në krye të OSBE-së në Shqipëri

Për katër vitet e ardhshme Zyra në Tiranë e Organizatës për Bashkëpunim dhe Siguri në Evropë (OSBE) do të kryesohet nga italiani Vincenzo Del Monaco, i cili do të zëvendësojë kështu Bernd Boschardtin. Lajmi është njoftuar në Twitter nga Zyra e OSBE-së në Itali, e cila i uroi fat Del Monacos.

“I urojmë suksese ambasadorit Vincenzo Del Monaco, të sapo-emëruarit kryetar i Prezencës së OSBE-së në Shqipëri. Italia ju uron gjithë të mirat dhe suksese në detyrën e re, për të mirën e agjendës së reformave të qeverisë dhe popullit shqiptar,” – shkruhej në Twitter-in e Zyrës italiane të OSBE-së.

A very Italian “in bocca al lupo” to Amb. Vincenzo Del Monaco, the newly-appointed Head of the @OSCE Presence in #Albania. ?? wishes you the best success in your new capacity, for the benefit of the Albanian government’s reforms agenda and Albanian people @OSCEinAlbania pic.twitter.com/LsXRRvQ30g

— Italy at OSCE (@ItalyatOSCE) September 30, 2020

Urime për detyrën e re në Shqipëri, ambasadorit të ri të OSBE-së i ka shprehur dhe ambasadori i Italisë në Tiranë, Fabrizio Bucci, i cili thotë se Del Monaco merr detyrën në një moment delikat për Shqipërinë.

Urime Përfaqësuesit të ri të @OSCEinAlbania, Vincenzo Del Monaco, me urimin të kryejë sa më mirë detyrën e tij në një moment delikat për #Shqipërinë në të cilin kontributi i OSBE-së do të jetë përcaktues. @ItalyatOSCE@ItalyMFA

— Fabrizio Bucci (@ItalianAmbALB) September 30, 2020

Para marrjes së kësaj detyre, Vincenzo Del Monaco ka shërbyer si ambasador i Italisë në Armeni, ndërsa më parë ka qenë dhe ambasador në Malin e Zi.

Në faqen zyrtare apo dhe në rrjetet sociale të Presencës së OSBE-së në Tiranë, të paktën deri mesditën e së mërkurës, nuk pati koment apo njoftim rreth këtij lajmi.

Ambasadorit Borchardt drejtonte Zyrën e OSBE-së prej vitit 2016 dhe i pati mbaruar mandati. Vitin e shkuar ai trazoi opinionin publik pasi i gjendur nën trysninë e disa protestuesve të zonës së Unazës së Re reagoi negativisht duke i ofenduar.

Për ngjarjen në fjalë, pati reagime nga opozita, ndërkohë që Presidenti Ilir Meta deklaroi publikisht se nuk do ta mirëpriste më në zyrë drejtuesin e OSBE-së, të cilin më parë e kishte ngarkuar me përgjegjësi politike dhe njëanshmëri rreth përplasjeve që lindën pasi vendosi të anulojë zgjedhjet vendore të 30 qershorit 2019.