Biden kushte për takim me Putin, reagon Kremlini

Presidenti i Shteteve të Bashkuara, Joe Biden ka lënë të kuptohet se është gati të flasë me homologun rus Putin nëse ky i fundit tregon vullnet për t’i dhënë fund pushtimit të Ukrainës.

Komentet e Biden ishin një përgjigje ndaj pyetjes së një gazetari gjatë vizitës së presidentit francez Emmanuel Macron.

Por presidenti amerikan i ka kushtëzuar bisedimet me mbështetjen e aleatëve të NATO-s.

“Jam gati të flas me presidentin Putin nëse ai është i interesuar për të gjetur një rrugë për t’i dhënë fund luftës, gjë që ende nuk e ka bërë”, deklaroi Biden.

Duke reaguar, Kremlini bëri të ditur se presidenti Putin mbetet i hapur për bisedime që janë në interes të Rusisë.

Gjithashtu, zëdhënësi Dmitry Peskov u tha gazetarëve se Moska nuk është ende gati të pranojë kushtet e Biden.

“Çfarë tha presidenti Biden? Tha se negociatat janë të mundura vetëm pasi Putin të lërë Ukrainën”, nënvizoi Peskov.

Ai shtoi se gjetja e terrenit për bisedime të përbashkëta është e vështirë për sa kohë Shtetet e Bashkuara nuk njohin si pjesë të Rusisë “territoret e reja” në Ukrainë, që Moska shpalli të vetat në fund të shtatorit.

Për herë të fundit, Biden dhe Putin u takuan në Gjenevë të Zvicrës qershorin e vitit të kaluar, përpara nisjes së luftës në Ukrainë, kur bisedimet ishin të fokusuara tek çarmatosja bërthamore dhe siguria kibernetike.

LEXONI GJITHASHTU:

• Biden i gatshëm të flasë me Putinin nëse ai vërtet dëshiron t’i japë fund luftës
• Biden-Macron miq kundër Putin, ‘armiq’ për çështje të tjera