Biden thirrje shtetasve amerikanë: Largohuni nga Ukraina

Presidenti Joe Biden u kërkon shtetasve amerikane që të largohen nga Ukraina sa më shpejt që të jetë e mundur, pasi sipas tij pushtimi rus është shumë pranë.

Në të njëjtën kohë, Washingtoni vijon të shpërndajë 3 mijë trupat ushtarakë në Lindje të Evropës. Dërgesa e parë me mjete e ushtarë u zhvendos në Rumani.

Gjithashtu, një ngarkesë e re me ndihmë ushtarake mbërriti në Ukrainë si pjesë e ndihmës  së Uashingtonit për të siguruar Kievin përpara forcës ruse.

Një pjesë e kësaj ndihme përdoret nga këmbësoria ukrainase në stërvitjet e saj të cilat po zhvillohen  në rajonin lindor të Donbasit.

Ndërkohë pamjet satelitore tregojnë se si Rusia po vendos trupa pranë të gjitha fronteve në kufirin ukrainas, në jug në Krime dhe Kursk në lindje. Në të njëjtën kohë po zhvillohen stërvitjet e përbashkëta ushtarake në veri në kufi me Bjellorusinë. Për shtetet baltike, kërcënimi dhe rreziku është i lartë.

Megjithatë, Rusia thotë se trupat do të largohen më 20 shkurt sapo të përfundojnë stërvitjet ushtarake.