Bienalja e Venecias ngre siparin: Mungon Rusia, protest para pavijonit izraelit

Bienalja e Venecias për vitin 2024 hapi të shtunën dyert për publikun, edhe pse pavijonet e shumë vendeve ishin hapur më herët.

Në edicionin e 60-të të Bienales marrin pjesë mbi 300 artistë nga 88 vende, përfshirë Beninin, Timorin Lindor, Etiopinë dhe Tanzaninë, të përfaqësuara për herë të parë.

Rusia mungon për të dytën herë rresht. Vendi kushtuar asaj, me vendim të palës ruse, është plotësuar nga Bolivia “mike”.

Por eventi nuk i ka shpëtuar efektit të luftërave. Përpara pavijonit të Izraelit disa qindra protestues pro-palestinezë u mblodhën më herët gjatë javës për të manifestuar, edhe pse nën masa të rrepta sigurie.

Pavijoni i shtetit hebre është i mbyllur. Përgjegjësi i tij zgjodhi ta mbante kështu derisa të arrihet armëpushimi dhe të lirohen pengjet.

Sidoqoftë, ai mund të vendosë ta hapë sërish, pasi Bienalja do të zgjasë deri në nëntor.