Biografia e Whitney Houston, vjen në ekran filmi kushtuar ikonës së muzikës botërore

“Whitney Houston: I Wanna Dance With Somebody,”, një film i kompanisë “Sony Pictures”, u shfaq për herë të parë në kinematë botërore ditën e premte.

“Për mua ishte një seri historish dashurie. Mendoj se kjo është mënyra e duhur për të treguar një biografi. Kjo është rruga e duhur. Ju jeni gjithnjë në kërkim të një rruge që të çon drejt historisë dhe për mua ishte kjo, një seri historish dashurie, herë të ndërlidhura dhe herë duke ndodhur në të njëjtën kohë; diku problematike dhe diku shumë të bukura”, u shpreh regjisorja Kasi Lemmons.

Filmi është menduar si një festë e mbushur me muzikë dhe si një lloj korrigjimi ndaj projekteve të tjera, që kishin një qasje më banale ndaj historisë së Huston.

“Po, unë doja ta portretizoja në mënyrën e duhur. U përpoqa ta tregoja të respektueshme, të dashur dhe madje t’i bëja homazhe asaj. Dhe të bëja që audienca ta shijonte teksa shikonte filmin, pa u larguar edhe nga telashet e saj. Pra, ka shumë zhvillime”, tha ajo më tej.

Naomi Ackie, që interpreton Houston, ndjeu peshën e përgjegjësisë në portretizimin e një ikone kaq të dashur të muzikës. Megjithatë, ajo thotë se arriti ta tejkalonte stresin.

“Po, mu desh të mësoja. Mësova se si të menaxhoja sa më mirë dhe sa më shpejt stresin. Ishte vetëm një pjesë e kësaj pune, por në aspektin e përgjithshëm, xhirimi mund të kthehet në një proces stresues ndonjëherë. Por kjo ishte diçka personale dhe unë nuk mund të bëja gjë tjetër veçse t’i ktheja në personale disa momente të jetës së saj sepse më ka pëlqyer shumë. Gjithashtu, duke ditur se njerëzit e donin shumë, në njëfarë pike duhet t’i harrosh të tjerat dhe të përkushtohesh tek puna”, u shpreh aktorja.

I shkruar nga autori i “Bohemian Rhapsody”, Anthony McCarten, filmi tregon ngjitjen e Houston, nga një  vajzë kori në Nju Xhersi në një yll botëror të muzikës, duke u fokusuar edhe tek gruaja prapa ikonës, tek telashet, triumfet e saj e deri tek vdekja në vitin 2012.

LEXONI GJITHASHTU:

• Zhani Ciko vlerëson Elsa Lilën: Super talent, vjen nga një jetë me nota dramatike
• Pse fituesi i Eurovizion u zgjodh nga publiku? Zhani Ciko jep arsyen
• Makina përplas 3-vjeçaren, shoqërohet në Komisariat drejtuesi i mjetit