Blendi Çeka: Të pavendosurit do t’i vënë partitë në lëvizje, në këto zgjedhje ka garë

Blendi Çeka, pedagog në Universitetin e Tiranës tha se numri i të pavendosurve, i cili nga sondazhi i parë në të tretin jo vetëm nuk ka ardhur duke u zbehur po ka një lloj konstanteje, përbën një zhvillim interesant dhe të rëndësishëm që përcakton garën në zgjedhjet e 25 prillit.

Sipas tij, të pavendosurit do të jenë një stimul i rëndësishëm për të gjitha partitë të mëdha e të vogla, që në fushatë të bëjnë ofertat e duhura në mënyrë që t’i afrojnë pas vetes.

“Gjithë partitë, PS, PD dhe koalicioni, dhe partitë e tjera kanë nevojë për atë 17,9 për qind të të pavendosurve dhe mendoj se ky 17,9 % po bëhet i vështirë.

Është zhvillim pozitiv që partitë të lodhen të përpiqen të modifikojnë, të raportojnë ndryshe ofertat.

Ky është momenti i qytetarëve, është pushteti i qytetarëve. Ata janë të domosdoshëm për të vendosur rezultatin. Ka nevojë për fushatë, kjo fushatë është garë serioze, mendoj se në këto zgjedhje ka garë”, tha z. Çeka.