Blinken takim me zyrtarët e lartë në Londër, Ukraina qendër e diskutimeve

Sekretari amerikan i Shtetit, Antony Blinken, pritet të mbështesë Ukrainën teksa mbrohet prej pushtimit rus, kur të nisë një vizitë në Londër, më 10 shtator, për t’u takuar me kryeministrin britanik, Keir Starmer, dhe zyrtarë tjerë britanikë.

Blinken, po ashtu, pritet të deklarohet edhe për luftën në Gazë, dhe paktin AUKUS për mbrojtje, në mes të Uashingtonit, Londrës dhe Kanberras.

Mirëpo, raportimet e fundit se Irani e ka furnizuar Rusinë me raketa balistike me rreze të shkurtër, nënkuptojnë që Shtetet e Bashkuara dhe Britania e Madhe do të synojnë të rrisin koordinimin ndaj veprimeve që disa i shohin si përforcim të përpjekjeve të Moskës për luftën në Ukrainë.

E përditshmja amerikane, Wall Street Journal dhe disa media tjera amerikane kanë cituar burime anonime të kenë thënë se raketat iraniane janë transferuar në moment kyç, në luftën 36 mujore të Rusisë në Ukrainë.

Presidenti ukrainas, Volodymyr Zelensky, dhe disa vende anëtare të NATO-s kanë inkurajuar mbështetjen e Kievit, dhe heqjen e kufizimeve, se si dhe kur forcat ukrainase mund t’i përdorin armët e Perëndimit në konflikt.

Bashkimi Evropian ka thënë më 9 shtator se ekziston informacion kredibil, i siguruar prej aleatëve, që Irani ka dërguar raketa balistike me rreze të shkurtër në Rusi, për t’i ndihmuar në luftë, andaj blloku evropian është zotuar për përgjigje “të shpejtë”.

LEXONI GJITHASHTU:

• Zelensky zbulon sa sipërfaqe kontrollon Ukraina në rajonin e Kurskut të Rusisë
• Stoltenberg: Ukraina ka arritur shumë në ofensivën brenda Rusisë