Bojkoti i kampionatit, kreu i Ligës Profesioniste: Klubet po luftojnë për një kauzë të madhe

Klubet shqiptare shprehen të vendosura për të vijuar bojkotin deri në plotësimin e katër pikave, të cilat prej muajsh i janë drejtuar qeverisë. Presidenti i Ligës Profesioniste, Edvin Libohova, u shpreh në “Ilva Now”, se në mesin e katër pikave, më kryesorja e tyre mbetet ligji i sponsorizimeve.

Ai tha se klubet janë gati të ulen në tryezë me qeverinë për të gjetur marrëveshje për vijimin e kategorisë superiore.

“Vendimmarrja e bojkotit është e klubet pjesëmarrëse të Superilgës. Liga Profesioniste është legalizuar vitin e kaluar. Është vendimmarrja e tyre për kërkesat dhe bojkotin. Ka tre katër vite që diskutohet problemi i incentivave dhe programeve mbështetëse në sport. Ata po luftojnë jo vetëm për veten e tyre. Po presim këto ditë të ulemi në tryezë. Jemi shumë dakord të ulemi. Ne presim të ulemi, kryesisht për ligjin e sponsorizimit. Ne kemi dhënë një propozim, i cili bazohet në shembullin e Kosovës. Unë jam i gatshëm të ulem në tryezë si përfaqësues i Ligës. Jemi gati të hyjmë në negociata, po presim”, tha ai.

Në fund z. Libohova tha se klubet po luftojnë për një kauzë të madhe, që sipas tij lidhet me formalizimin e sportit në Shqipëri.

“Të gjithë përfaqësuesit e Ligës e mbështesin bojkotin. Klubet po luftojnë për një kauzë më të madhe, nuk është vetëm për një sezon. Na duhet një ligj, që në vitet e ardhshme të legalizohet sporti”.

Intervista e plotë: