Bolsonaro planifikonte të arratisej në Argjentinë, thotë policia braziliane

Policia në Brazil ka akuzuar ish-presidentin Jair Bolsonaro, 70 vjeç, dhe djalin e tij 41-vjeçar Eduardo për pengim të drejtësisë.

Ata pretendojnë se të dy u përpoqën të ndërhynin në gjyqin që po zhvillohet aktualisht kundër Bolsonaros së vjetër, në të cilin ai akuzohet për udhëheqjen e një grushti shteti të tentuar pas humbjes së tij në zgjedhjet presidenciale të vitit 2022.

Policia thotë se ka gjetur një dokument në telefonin celular të Jair Bolsonaros, i cili sugjeron se ai planifikonte t’i shmangej procedurave penale duke kërkuar azil në Argjentinë.

Ata gjithashtu akuzojnë Eduardo Bolsonaron për lobim në administratën Trump në emër të babait të tij – gjë që ata thonë se çoi në vendosjen e tarifave ndëshkuese nga SHBA-të për mallrat braziliane.

Raporti policor prej 170 faqesh vjen më pak se dy javë para fillimit të fazës përfundimtare të gjyqit për grusht shteti dhe shton presionin mbi ish-udhëheqësin.

Jair Bolsonaro mohon të ketë komplotuar për të përmbysur humbjen e tij në zgjedhjet e vitit 2022 ndaj rivalit të tij të majtë, Luiz Inácio Lula da Silva.

Por ai ka vënë në pikëpyetje drejtësinë e procedurave kundër tij, duke pretenduar se është shënjestër e një “gjuetie shtrigash politike”.

Ai i tha agjencisë së lajmeve Reuters muajin e kaluar se “nuk kishte asnjë dyshim” se pesë gjyqtarët e Gjykatës së Lartë të ngarkuar me dhënien e vendimit kishin vendosur tashmë për dënimin e tij.

Por në atë kohë, ai mohoi të kishte bërë ndonjëherë plane për t’iu shmangur gjyqit.

LEXONI GJITHASHTU:

• Policia braziliane i konfiskon pasaportën ish-presidentit Bolsonaro
• Jair Bolsonaro kthehet në Brazil, për herë të parë që nga trazirat e 8 janarit